O BNG reparte boletín informativo con propostas urxentes de mellora para Vilanova de Tenorio

Trala participación nun encontro con veciños e veciñas do lugar de Vilanova, na parroquia de Tenorio, o BNG logra que o pleno aprobe unha relación de melloras a pesar da abstención do PP do sr Cubela.

Urxe a modernización do lugar tal e como denuncia a veciñanza. Así en palabras do portavoz nacionalista, Ernesto Filgueira: “constatamos múltiples e importantes deficiencias: falta de limpeza nas canalizacións de pluviais, solagamento da marquesiña escolar en días de chuvia, falta de saneamento en múltiples zonas, ausencia total de fibra óptica, entre outras”.

Está claro que Vilanova, en palabras de Filgueira, “precisa unha actuación integral, moito máis alá de dar solucións aos problemas citados, por iso instamos ao goberno municipal a crear un nucleo de centralidade na contorna da Casa do Pobo, coa creación dunha praza empedrada, ordeada e co tráfico calmado, para que a veciñanza conte cun espazo de identidade propia que permita desenvolver a vida social, cultural e de lecer”.

Alén da creación deste espazo de centralidade, o portavoz nacionalista incide na importancia de mellorar as vías de acceso ao propio nucleo, mellorando ademais o saneamento, a iluminación e a rede de pluviais.

Por último o portavoz do BNG insta ao goberno municipal a realizar as xestións precisas para que a fibra óptica chegue a toda Vilanova, e a traballar na política de residuos, mellorando a recollida selectiva, creando illas para os colectores, e distribuindo composteiros individuais ás vivendas do lugar.

Todas estas demandas, en forma de moción, foron aprobadas en sesión plenaria pese a abstención do PP e de Jorge Cubela.

BOLETÍN INFORMATIVO