Ernesto Filgueira demanda un proxecto integral que poña en valor e promocione as laxes rupestres de Cerdedo-Cotobade

A actual situación na que se atopan as laxes dos petróglifos de Cerdedo-Cotobade é, por desgraza, de completo abandono. Falta de limpeza, ausencia de barreiras perimetráis sólidas de protección, escasa ou nula sinalización, ou accesos intransitábeis, invadidos por matorral, tal e como denunciamos recentemente nas laxes do Lombo da Costa, na Laxe das Rodas ou na Laxe do Cuco en San Xurxo; unha situación que tamén se repite na Portela da Laxe de Viascón. 

O alcalde publicita periódicamente achegas económicas da Xunta que se limitan a acometer rozas, sen acabar de presentar nunca un proxecto potente que permita pór en valor todo o rico conxunto de gravados rupestres cos que contamos en Cerdedo-Cotobade. 

Paro o BNG, que leva anos instando ao sr Cubela a pór en marcha un Centro de Interpretación dos Petróglifos de Cerdedo-Cotobade, é necesario crear un produto turístico e cultural de primeira magnitude que permita facer do noso rico legado arqueolóxico un importante catalizador económico para os negocios das nosas parroquias. Este ambicioso proxecto debería completarse cun riguroso estudo de creación de marca propia e un plan de promoción tanto en medios convencionais e redes sociais, ademáis de establar negociacións con touroperadores turísticos para para introducilos na paquetización de programas de viaxes culturais e atraer un tipo de turismo de calidade ás nosas terras. 

Segundo afirma Filgueira: “O PP e o sr Cubela andan con parches, sen entender que as laxes rupestres son recursos claves para o desenvolvemento estratéxico do eido turístico-cultural do noso concello”. 

O BNG -lembrou o portavoz municipal- “ten presentado numerosas iniciativas durante o presente mandato, todas elas rexeitadas polo PP e o sr Cubela, e tamén levamos tres anos trasladando estas iniciativas en forma de emendas aos orzamentos de Galiza, que tamén foron desouvidas polo goberno do PP”.